𝗣𝗘̈𝗥𝗙𝗨𝗡𝗗𝗜𝗠𝗜 𝗧𝗥𝗔𝗚𝗝𝗜𝗞 𝗜 𝗡𝗝𝗘̈ 𝗛𝗨𝗠𝗔𝗡𝗜𝗦𝗧𝗜 𝗚𝗝𝗘𝗥𝗠𝗔𝗡 𝗡𝗘̈ 𝗦𝗛𝗤𝗜𝗣𝗘̈𝗥𝗜𝗡𝗘̈ 𝗞𝗢𝗠𝗨𝗡𝗜𝗦𝗧𝗘

𝙅𝙤𝙨𝙚𝙛 𝙈𝙖𝙧𝙭𝙚𝙣 𝙡𝙞𝙣𝙙𝙪𝙧 𝙢𝙚̈ 𝟮 𝙜𝙪𝙨𝙝𝙩 𝟭𝟵𝟬𝟲 𝙣𝙚̈ 𝙒𝙤𝙧𝙧𝙞𝙣𝙜𝙚𝙣 𝙖𝙛𝙚̈𝙧 𝙆𝙤̈𝙡𝙣-𝙞𝙩, 𝙫𝙙𝙞𝙦 𝙢𝙚̈ 𝟭𝟲 𝙣𝙚̈𝙣𝙩𝙤𝙧 𝟭𝟵𝟰𝟲 𝙖𝙛𝙚̈𝙧 𝙏𝙞𝙧𝙖𝙣𝙚̈𝙨, 𝙞𝙨𝙝𝙩𝙚 𝙣𝙟𝙚̈ 𝙥𝙧𝙞𝙛𝙩 𝙠𝙖𝙩𝙤𝙡𝙞𝙠 𝙧𝙤𝙢𝙖𝙠 𝙜𝙟𝙚𝙧𝙢𝙖𝙣. 𝙉𝙚̈ 𝙫𝙞𝙩𝙞𝙣 𝟭𝟵𝟯𝟲 𝙙𝙚̈𝙧𝙜𝙤𝙝𝙚𝙩 𝙨𝙞 𝙢𝙞𝙨𝙞𝙤𝙣𝙖𝙧 𝙣𝙚̈ 𝙎𝙝𝙦𝙞𝙥𝙚̈𝙧𝙞, 𝙠𝙪 𝙢𝙚̈ 𝟭𝟵𝟰𝟲 𝙥𝙪𝙨𝙝𝙠𝙖𝙩𝙤𝙝𝙚𝙩.

Nga viti 1936 deri në vitin 1941, Josef Marxen shërbeu si pastor në Perlat, një fshat në rajonin e Mirditës me banorë ekskluzivisht katolikë. Aty kishte ndikim të madh në popullatë dhe ndikoi në ndalje të hakmarrjes ndaj disa familjeve të armiqësuara. Ai përdorte njohuritë mjekësore që kishte marrë në përgatitjen për punën e tij misionare në shërbim në banorëve të rrethit. Një shqetësim i rëndësishëm për të ishte rritja dhe edukimi i fëmijëve.

Nga viti 1941 deri në vitin 1945, Josef Marxen shërbeu si pastor në Jubë afër Durrësit, ku ka mbajtur kontakte të ngushta me peshkopin Vinçenc Kolë Prenushi. Komuniteti i tij përfshinte disa fshatra në të cilat jetonin katolikë, ortodoksë dhe myslimanë. Kur ushtarët gjermanë pushtuan zonën, ai ndërmjetësoi mes tyre dhe popullatës.

Kur u larguan nga Durrësi, ushtarët gjermanë i ofruan pastorit Marxen që ta merrnin në Gjermani, pasi ai nuk do të ishte më i sigurt nën sundimin komunist. Megjithatë, ai zgjodhi të qëndronte në kishën e tij. Rreth tre muaj më vonë, në shkurt 1945, arrestohet në Durrës dhe dërgohet në burgun e Tiranës. Pleqtë e fshatrave në komunitetin e tij, duke përfshirë ortodoksë dhe myslimanë, shkruan një letër duke kërkuar lirimin e tij. Në qershor 1945 arrestohet sërish dhe dërgohet në Tiranë. Pas burgosjeve dhe torturave, ai u pushkatua në një pyll afër Tiranës, më 16 nëntor 1946.