Për të liruar burgjet e mbipopulluara daneze, deri në 300 të burgosur të huaj do të vuajnë dënimin në Kosovë. Pas kësaj ata do të dëbohen.
Danimarka do të
dërgojë deri në 300 të burgosur të huaj në Kosovë për të lehtësuar burgjet e
saj. Ministria daneze e Drejtësisë njoftoi se kishte nënshkruar një
"marrëveshje inovative" me Prishtinën, sipas së cilës të burgosurit
do të akomodohen në burgun e Kosovës në Gjilan për 15 milionë euro në vit. Hapësirat e burgut
do të jepen me qira për të strehuar kriminelët që janë dënuar me dëbim nga
Danimarka.
Marrëveshja do të
sigurojë kapacitet më të mirë në burgjet e mbipopulluara daneze dhe do të
largojë presionin nga stafi danez i burgjeve, tha Ministri i Drejtësisë Nick
Hækkerup. Gjithashtu, duhet të dërgohet një sinjal për të huajt që janë dënuar
me dëbim pas vuajtjes së dënimit. "E ardhmja juaj nuk është në Danimarkë,"
tha Hækkerup. Ai nënshkroi kontratën, ashtu si ministrja kosovare e Drejtësisë,
Albulena Haxhiu.
Mbipopullimi i
burgjeve daneze mbi 100 për qind
Një deklaratë e
synimit për projektin ishte nënshkruar tashmë në dhjetor 2021. Konkretisht, nga
fillimi i vitit 2023, deri në 300 kriminelë nga vendet e treta të dënuar në
Danimarkë do të strehohen në Kosovë. Thuhet se do të zbatohen të njëjtat kushte
burgu si në burgjet daneze, për këtë arsye burgu në Gjilan do të rindërtohet.
Pas vuajtjes së dënimit, të dënuarit do të dërgohen drejtpërdrejt në vendet e
tyre të origjinës. Parlamentet e të dy vendeve ende duhet ta miratojnë
projektin.
Që nga viti 2015,
numri i të burgosurve në burgje në Danimarkë është rritur me 19 për qind - në
fillim të vitit 2021 ishin 4000 persona në burg, që do të thotë se shkalla e
zënies është mbi 100 për qind. Gjatë së njëjtës periudhë, numri i gardianëve të
burgjeve në vendin skandinav prej 5.8 milionë banorësh ra me 18 për qind.
Nuk është hera e
parë që Danimarka dëshiron të kontraktojë strehimin e të huajve. Në qershor,
vendi i BE-së miratoi një ligj që lejon zhvendosjen e qendrave të
azilkërkuesve.
Comments