Zhvillimet e fundit, në raport me dialogun Kosovë - Serbi, në dritën e planit franko - gjerman 11 pikësh, i mbështetur nga ShBA-të, për arritjen e një marrëveshje të mundshme mes Kosovës e Serbisë, liderët opozitarë kosovarë dhe telallët e tyre destruktivë analisto-opinionistë, të frustruar që u demaskuan si proamerikanë të rrejshëm, në antiamerikanë të thekur, për llogari të Serbisë.
Agjitropi i
shfrenuar, i paskrupull dhe sofist i opozitës dhe hajka analisto-opinioniste
kosovare, nuk la gurë pa lëvizur, për ta bindur kryeministrin Albin Kurti që ta
refuzojë planin franko-gjerman dhe ta sjellë Kosovën në të njëjtat frekuenca me të Aleksandar Vuçiqit, me pasoja
të pariparueshme për shtetin e Kosovës.
Kryeministri
Albin Kurti, stoikisht qëndroi në ballë
të detyrës historike dhe pa u lëshuar në kompromise të dëmshme për vendin,
pranoi planin franko-gjerman dhe demoloi tendencën serbe për krijimin e
Asociacionit të Komunave me shumicë serbe sipas insistimit të Vuçiqit me
kompetenca ekzekutive, bazuar në marrëveshjen e Brukselit më 2013 dhe 2015, e
cila po të realizohej, do të realizohej synimi i Serbisë për defunksionalizimin
e shtetit të Kosovës.
Aftësia
diplomatike dhe qëndrimi konsekuent i kryeministrit Albin Kurti në ballafaqim
direkt me autokratin shovinist serb Vuçiq, detyroi përfaqësuesin e BE-së
Mirosllav Lajçak, të sjellë në Prishtinë 15 modele të aplikuara në Evropën
Perëndimore mbi organizimin e pakicave kombëtare, e që Kosova, mund të shërbehej
me elemente pozitive të këtyre modeleve.
Me këtë ofertë
evropiane, njëherë e mirë degradohet kërkesa djallëzore e Serbisë për
Asociacionin.....me kompetenca.....dhe padyshim, krijohen prerogativa të
pakushtëzuara për ruajtjen e pacenueshmërisë, sovranitetit dhe integritetit territorial
të shtetit të Kosovës, ku Serbisë i pamundësohet të ndërhyjë në rregullimin e
brendshëm politik-juridik të vendit tonë sovran e të pavarur.
(Sejdi Sopi)
Comments