Ndër popujt më të mëdhenj të Ballkanit, populli shqiptar u copëtua si qengji në sofër nga fqinjët ballkanik të ndihmuar prej Rusisë dhe fuqive të mëdha.
Ashtu siç rrodhën ngjarjet tragjike për kombin
tonë, ishte e pamundur të materializohen përpjekjet dhe sakrificat e popullit
tonë për konsolidim përbashkues politik, ekonomik, ushtarak etj., përkundrazi,
në kontinuitet është kërcënuar qenia e tij si komb, nga armiqët shovinistë
fqinj.
Kur menduam që, me çlirimin e Kosovës më 1999,
nga pushtuesi i egër serbomadh, çështja shqiptare ka hyrë në kahjen pozitive të
zhvillimit dhe konsolidimit kombëtar e shtetëror, në momentet vendimtare për
ndarjen paqësore nga Serbia, përmes dialogut të ndihmuar nga Bashkimi Evropian
e të mbështetur nga ShBA, nga mjedisi i kontaminuar prosllav i Kosovës,
nxjerrin kokë agjentura serbe, fundërrina nga trashëgimia e të shkuarës
ogurzezë.
Burimet diplomatike evroperëndimore, na bëjnë
të kuptojmë, një nga arsyet e forta, pse, vendet që e ndihmuan çlirimin e
Kosovës, sidomos ShBA-të, janë rreshtuar kundër kryeministrit të Kosovës dhe
pro Serbisë, me rastin e bandave kriminale ushtarake serbe, të cilët veriun e
Kosovës e shfrytëzojnë si poligon për destabilizimin e vendit tonë, për incidente dhe konflikt të hapur.
Kryefashisti serb Aleksandar Vuçiq, për të shmangur dyshimet tek diplomacitë perëndimore se nuk dëshiron
marrëveshje gjithëpërfshirëse me Kosovën, ka futur në lojë agjenturat politike,
mediatike dhe propagandistike shqiptare në Kosovë e Shqipëri, duke grumbulluar
"fakte dhe argumente" të paqena se, gjoja Albin Kurti, angazhohet në
militarizimin e Kosovës dhe përgatitjen për një konfrontim ushtarak me Serbinë,
i cili do ta shkaktonte një nga vatrat më të rrezikshme të luftës me përmasa të
gjëra, me pasoja për Ballkanin dhe Evropën.
Në mënyrën më të turpshme dhe për synime më të
errëta, me parat e sigurta të Serbisë dhe Rusisë, hienat politike, mediatike
shqipfolëse në Kosovë dhe Shqipëri, duhet të demaskohen me forcën e argumenteve
për tradhti kombëtare, mbase, për momentin nuk ka shanse të sillen para
drejtësisë.
Konsolidimi i shtetit të Kosovës arrihet në
ngritjen dhe zhvillimin e të gjitha segmenteve që e bëjnë shtetin, shtet.
Sejdi Sopi
Comments