Shtetet afrikane dhe ato të Karaibeve kanë bërë thirrje për kërkimfalje zyrtare, falje borxhesh dhe dëmshpërblime financiare nga vendet që përfituan nga tregtia transatlantike e skllevërve.
Kërkesat janë pjesë e një plani prej 19 pikash, i miratuar në përfundim të një konference treditore të mbajtur në Ganë. Plani u hartua nga Bashkimi Afrikan (AU) dhe Komisioni për Reparacione i Komunitetit të Karaibeve (Caricom), megjithëse nuk përmenden shtete të veçanta që duhet të kërkojnë falje.
Në mars të këtij viti, Kombet e Bashkuara miratuan një rezolutë që e cilëson tregtinë transatlantike të skllevërve si "krimin më të rëndë kundër njerëzimit". Rezoluta u miratua me 123 vota pro, pavarësisht kundërshtimit ose abstenimit të Shteteve të Bashkuara, vendeve të Bashkimit Evropian, Britanisë së Madhe dhe Izraelit. Edhe Gjermania absteni.
Plani parashikon krijimin e një fondi global për reparacione, falje të borxheve për vendet e prekura, reforma në institucionet financiare ndërkombëtare për të siguruar përfaqësim më të drejtë të vendeve të Jugut Global, si dhe kthimin e objekteve kulturore dhe mbetjeve mortore të grabitura gjatë periudhës koloniale.
Po ashtu, kërkohet financim për drejtësinë klimatike dhe masa për dokumentimin e dhunës së ushtruar ndaj grave dhe vajzave afrikane gjatë periudhës së skllavërisë. Një tjetër kërkesë është që shtetet afrikane t'u ofrojnë njerëzve me prejardhje afrikane në diasporë të drejtën e rikthimit dhe rrugë për marrjen e shtetësisë.
Sipas projektit "SlaveVoyages" të Universitetit Rice në SHBA, gjatë periudhës nga shekulli XVI deri në shekullin XIX rreth 12.5 milionë afrikanë u kapën dhe u transportuan me forcë drejt Amerikës Veriore, Amerikës Jugore dhe Karaibeve. Vlerësohet se midis një dhe dy milionë njerëz humbën jetën gjatë udhëtimit përtej Atlantikut.
Comments