PARTIA DEMOKRATIKE E KOSOVËS FORMON "QEVERI" NËN HIJE!
Në shtetet ku ndërtohet dhe funksionon
demokracia dhe sistemi pluralist parlamentar, gjithashtu me rregullim
kushtetues si shtet multietnik por unitar, me të drejta të barabarta
ndëretnike, ndërkulturore....., si rasti i Kosovës, është fenomen i paprecedent
që, një parti politike opozitare, të formojë qeveri imagjinare si kundërvënie e
Qeverisë zyrtare legjitime, të konstituuar sipas rezultateve të votës së lirë të sovranit popull.
Paaftësia e PDK-së, për të zhvilluar
opozitarizmin konstruktiv në Parlamentin e Kosovës, i kthehet politikës
retrograde të logjikës së qeverisjes paralele të viteve 1990-ta dhe periudhës
tekanjoze të ekzistencës së dy qeverive konfliktuale gjatë luftës çlirimtare të popullit të Kosovës e më
pastaj!
Ky shembull i keq, i pa vlerë dhe i pabazuar
në rrethanat e Kosovës, kur ndodhet në proces të ndërtimit të shtetit
funksional demokratik e juridik, PDK, vetëdijshëm ose jo, tenton të sjell koincidencë
me pushtetet paralele jolegjitime në Oseti, Aphazi dhe në një krahinë rusofile
të Moldavisë. Nuk përjashtohet as modeli i Republika Srpska në Bosnjë e
Hercegovinë.
PDK dhe lidershipi i saj, duhet ta vrasin
ndërgjegjen se, veriu i Kosovës i përbërë me shumicë serbe, mund të gjej shkas
si pretekst, tendencën për komplikime shtesë në refuzimin e zbatimit të ligjit
nga organet legjitime të shtetit të Kosovës.
Partia Demokratike e Kosovës, duhet ta kuptojë
njëherë e përgjithmonë se, në Kosovën e pavarur, sovrane dhe demokratike, forma
të paralelizmit të pushtetit, nuk i kontribuojnë shtetndërtimit në proces të
Kosovës. PDK, duhet të heqë dora nga lojëra të rrezikshme e t'i kthehet luftës
parlamentare konstruktive në Parlament, për ta mbajtur në mënyrë permanente
mbikëqyrjen e punës së Qeverisë së Kosovës.
Askush nuk ka të drejtë të krijojë situata me
të cilat mund të manipulojë Serbia dhe të nxisë orekset çetniko-shoviniste ndaj
integritetit territorial të vendit tonë.
Comments