Më 18 gusht 2022, në Bruksel, me organizimin
dhe mbështetjen e BE-së, zhvillohet takimi dypalësh, kryeministri i Kosovës
Albin Kurti - Aleksandar Vuçiq, presidenti i Serbisë. Ky takim zhvillohet në
momentet e një klime të tensionuar, e cila buron nga retorika agresive
kërcënuese e politikës serbe ndaj Kosovës.
Kryeministri i Kosovës Albin Kurti, ka
deklaruar decidivisht që, në Bruksel shkon për të arritur zgjidhje për të
pagjeturit, të zhdukurit gjatë luftës, njëkohësisht, arritjen e marrëveshjes
finale për njohje reciproke Kosovë - Serbi. Meqë, nuk pritet ndonjë rezultat
spektakolar, me rëndësi është që, kryeministri Kurti, t'ia bëj të qartë Vuçiqit
dhe BE-së neutrale se, Kosova është shtet sovran dhe i pavarur, e që janë të shteruara
ambiciet e kujtdo qoftë, në rikthim të çfarëdo dialogu e kompromisi, që prekë
pavarësinë shtetërore, juridike e politike të Kosovës.
Në anën tjetër, Aleksandër Vuçiq, i
vetëdijshëm që, me Albin Kurtin, s'do ta ketë të lehtë të bisedojë nga pozita e
më të fortit, e të imponojë rregulla, siç ka ndodhur në bisedimet e kaluara me
taktizime e shantazhe tipike shoviniste serbe. Ai (Vuçiq), në takimin me Albin
Kurtin, do të përpiqet, të luaj në kartën vajtuese gjithashtu tipike serbe, se
gjoja Qeveria e Kosovës me në krye Albin Kurtin, me masat e reciprocitetit, po
e kërcënon ekzistencën e serbëve në Kosovë, paqen dhe stabilitetin.
A. Vuçiq, duke aktruar rolin e faktorit
paqësues e stabilizues, do ta provojë të fitojë mbështetje nga qarqe stereotipe
të hamendshme brenda strukturave të BE-së, me synim që t'i bëhet presion
kryeministrit Kurti për kompromise eventuale, ku Vuçiq do ta përdorte si adut,
për t'iu shmangur angazhimit konstruktiv drejt një marrëveshje për njohje
reciproke të obligueshme ligjërisht dhe ndërkombëtarisht.
Për efekte të retorikës propagandistike,
presidenti serb Vuçiq, djallëzisht, provon të shërbehet edhe nga qarqe
opozitare dhe mediatike propagandistike e nihiliste të Kosovës, të cilat e
akuzojnë Albin Kurtin për bllokim të dialogut dhe mosgatishmëri të zgjidhjes komprometuese
të marrëveshjeve të kaluara me Serbinë, dukshëm të dëmshme për Kosovën.
Spektri politik i Kosovës, pozitë dhe opozitë,
e kanë për detyrim nacional, për fatet e shtetit të Kosovës, të manifestojnë
ndërgjegje të lartë, të mos krijojnë hapësirë fushëveprimi, ku Serbia do mund
të penetrohej suksesshëm në sabotimin dhe neutralizimin e funksionimit normal
të shtetit tonë.
Opozitarizmi i arsyeshëm konstruktiv në
politikën e brendshme, nuk guxon të shndërrohet në fushatë destruktive që puqet
me interesat serbe, nga e cila do të përfitonte politika antikosovë e
Serbisë....!
Qëndrimi parimor i Qeverisë Kurti, pa ekuivoke
duhet mbështetur me konsensus në raport me Serbinë.
(S.S.)
Comments