Në Republikën e
Kosovës, liria fetare dhe e besimit, gëzon të drejtën maksimale kushtetuese dhe
nuk ekziston asnjë pengesë ligjore që, feja dhe besimi t'i cenohet individit
apo ndonjë grupi etnik, kulturor ose fetar.
Në shtetin e
Kosovës, liritë e bindjes, besimit fetar, shprehjes së lirë...është e
pakufizuar, e garantuar me kushtetutë. Por, një duhet ta kemi të qartë të
gjithë që, Kosova është e përcaktuar me kushtetutë shtet sekular dhe
rrjedhimisht feja vepron e pavarur dhe e ndarë nga shteti.
Në aspektin
funksional politik dhe gjithëshoqëror, shteti është autoritet madhor përcaktues
i rregullimit të brendshëm, bazuar në kushtetutë dhe ligje të aplikueshme, të
miratuara në Kuvendin e Kosovës pluralist dhe demokratik. Kosova, ligjërisht
është e avancuar në realizimin e të drejtave qytetare individuale dhe
kolektive. Këto të drejta realizohen në mënyrë të pacënueshme ndaj askujt.
Në anën tjetër,
Kosova ka të drejtën e patjetërsueshme, të parandalojë dukuritë dhe tendencat e
faktorëve që tejkalojnë me ambiciet për të ndërhyrë e devijuar sistemin juridik
kushtetues funksional të Republikës së re të Kosovës.
Ne të gjithë e
dimë që, Kosova, ka probleme të mëdha me kishën ortodokse serbe dhe strukturat
kriminale të instrumentalizuara nga Serbia, por, është vështirë e kuptueshme,
për shqiptarët shumicë të besimit islam, çka dëshirojnë të arrijnë grupe
heterogjene fetare brenda kombit tonë, të cilët organizojnë peticione e forma
të ndryshme të trysnive ndaj Qeverisë së Kosovës, që të futet në shkolla
publike uniforma-mbulesa e vajzave që vijojnë shkollimin.
Çështja e bartjes
së shamisë në shkolla nga vajzat besimtare të devotshme myslimane, nuk do duhej
të lejohet deri në moshën 18 vjet të adoleshenteve, për shkakun se, ende, në
vendin tonë, në rrethe të caktuara rurale por edhe urbane ekzistojnë gjurmë të
jetës patriarkale, fëmijët e familjeve të cilave, pa dëshirën dhe bindjet e
tyre detyrohen të bartin shami apo uniforma, mbulesa të karakterit fetar.
Kosova e vogël,
nuk mund dhe nuk duhet të bëhet arenë e përhershme e imponimeve dhe të ndërhyrjeve
të rrymave ideologjike e sektare fetare të importuara ngado, me ndikime e
influenca negative për shoqërinë tonë, foshnjë e demokracisë dhe lirisë së
gjithanshme.
(S.S.)
Comments