“Këshilli i Paqes”, një iniciativë e ndërmarrë nga presidenti i Shteteve të Bashkuara, Donald Trump, u themelua zyrtarisht gjatë një ceremonie të mbajtur në margjinat e Forumit Ekonomik Botëror në Davos. Nisma synon të krijojë një platformë të re ndërkombëtare për promovimin e paqes, stabilitetit dhe dialogut në zonat e konfliktit, me fokus të veçantë në Lindjen e Mesme dhe Rripin e Gazës.
Në kuadër të kësaj iniciative, presidentja e Kosovës, Vjosa Osmani, është zgjedhur anëtare e Këshillit të Paqes, duke e bërë Kosovën pjesë të këtij forumi të ri global. Zgjedhja e Osmanit vlerësohet si një njohje e rolit të Kosovës në promovimin e paqes, demokracisë dhe stabilitetit rajonal, si dhe e përvojës së saj si shtet i dalë nga konflikti.
Qëndrimet ndërkombëtare
Ndryshe nga presidenti francez Emmanuel Macron, i cili ka shprehur rezervat e tij publikisht, kancelari gjerman Friedrich Merz ende nuk ka dhënë një refuzim të hapur ndaj “Këshillit të Paqes”. Megjithatë, sipas burimeve qeveritare në Berlin, miratimi i kartës së këshillit në formën e saj aktuale nuk konsiderohet i pranueshëm.
Gjermania thekson se mbështet në parim çdo iniciativë që kontribuon në paqen dhe stabilitetin në Rripin e Gazës, por nënvizon se çdo veprim duhet të zhvillohet në përputhje me të drejtën ndërkombëtare dhe rendin juridik ndërkombëtar.
Këto qëndrime tregojnë se, megjithëse iniciativa e Trumpit ka ngjallur interes dhe mbështetje nga disa aktorë, ajo mbetet ende objekt debatesh dhe vlerësimesh kritike në skenën ndërkombëtare.
/xh.selmani/
Comments